الحقيقة والسراب وسع للخناقة

الحقيقة والسراب .. وسع للخناقة

مسلسل الحقيقة والسراب آصلا آصلا كان معمول لنادية الجندي.. بس إعتذرت بعد الإتفاق وقبض العربون عشان إختلفت مع المخرج مجدي أبو عميرة والمؤلفة سماح الحريري. فجابوا فيفى عبده..

والحقيقة فيه 3 روايات لإعتذار نادية الجندي أنا مش عارف ايه الصح فيهم

الاولى إنها طلبت تعديلات على الشخصية إترفضت من المؤلفة والمخرج
التانية إنها طلبت أجر كبير مقدرش عليه المنتج.
التالتة إن مجدي ابو عميرة كان عايز رانيا يوسف معاها في المسلسل ورانيا يوسف تبقى مرات جوزها فهي قالت اكسكيوز مي ايام اوت.. اكسكيوز مي دي بتاعت فيفي عبده.. فجابوا فيفي.. ولما مشيت نادية مجابوش رانيا يوسف اصلا.. الله إنتوا بتناقروا في الست بقى..

دور باسم ابو السعود الشهير بماما يا ستي .. أصلا كان أحمد عز اللي هيعمله بس ساعتها .. شركة تانية كلموه إتفقوا معاه يعمل مسلسل مع يسرا “ملك روحي” .. فساب المسلسل فـ جابوا احمد سعيد عبد الغني .. الباد بودي بتاع الدراما المصرية وقتها…. المؤلفة كانت عاملة خط بإسم خط جاد إنه شخص وسيم بشكل لا يقاوم فمنال وقعت فيه من أول ما شافته… عشان كدا إختاروا أحمد عز.. مع إنه معروفة شخص وسيم بشكل لا يقاوم يبقى أحمد بهاء.. بس مكانش إتولد..

فيفي عبده مكانتش طايقة سمية الخشاب في المسلسل … ومرة قالتلها قدام الكاميرا يا زرقا.. ودا مش مكتوب في السيناريو … سمية إنهارت وقعدت تعيط .. وهي اللي إخترعت إسم بنت رمزية جلابية.. ودا بشهادة المؤلفة نفسها.. وقالت إن المسلسل كانت كواليسه صراع بين الاتنين… هتقولي يا سلام مهما عملوا مع بعض كيد النسا.. هقولك يعني عملوه بعدها بيومين.. ما قعدوا سنين مش طايقين بعض..

مفاجأة بقى .. داليا مصطفى هي اللي كانت عاملة دور منال أصلا .. وبعدين كلموها على مسلسل إسمه البنات .. فسابت المسلسل بعد ما صورت كام يوم .. وراحت لمسلسل البنات لأنها شايفة أنه هينجح اكتر .. وسبحان الله الحقيقة والسراب ينجح والبنات دا محدش شافه غيري أنا وشريف سلامة جوز داليا مصطفى… ودا مش لانه جوزها لا لانه كان مشارك فيه..

مي عز الدين كانت بتعمل دور سلوى اللي هي “ريهام عبد الغفور” بنت ماجدة بندانة”، ولما مشيت داليا مصطفى، مي عز الدين قالت لمجدي ابو عميرة ممكن انا أعمل دور منال.. بصلها كدا بكل حنية.. وشاف فيها حاجة فقالها لا طبعا.

هو كان شايف إن مي مش باد جيرل فـ محدش هيصدقها.. بس مي جاتله تاني يوم صابغة شعرها وعاملاه كيرلي .. فـ مجدي أبو عميرة قالها دا البوست بتاع بهاء حجازي عشان لو إتسرق يعني … وفعلا أسند ليها دور منال…

نبيلة أو بلبلة مرات أبيه رياض .. كانت الفنانة روجشينا .. لكن روجينا مشيت ومش عارف السبب.. أكيد كان فيه نحتاية تانية.. فجابوا سمية الخشاب… عشان تاخد لقبين من مدام فيفي، الأول الزرقا، والتاني بنت رمزية جلابية..

ومن هنا أحب أوجه كل الشكر والتحية لأبيه رياض اللي فهم التيتة ومات بدري في الحلقة السابعة باين..

#بهاء_حجازي