كوت ديفوار ولعنة الفراعنة لماذا تخشى كوت ديفوار مقابلة مصر
في سنة 2006 مصر لاعبت كوت ديفوار في دور المجموعات فإتصاب الحارس بتاعهم “تيزي” ونزل مكانه الحارس أبو بكر باري وهو كان لسه صغير يعني فنزل دخل فيه جولين وساعتها قعد يبكي وكل الناس إتعاطفت معاه.. شاب وبيعيط بحرقة علشان بلده..
وساعتها مصر وكوت ديفوار وصلوا النهائي.. ورجع حارسهم الأساسي جان جاك تيزي ومصر كسبت بضربات الجزاء.. وأبو بكر باري قعد يعيط عياط هستيري.. إحنا إتلخمنا في كورة أبو تريكة .. بس هو الولد كان منهار بيعيط من قلبه..
في 2007 إعتزل تيزي وبقى أبو بكر باري هو الحارس الأساسي لكوت ديفوار ولعبت مصر مع كوت ديفوار في أمم 2008.. وجابت جول في أبو بكر باري هدف لأحمد فتحي هتشوف الكورة 50 مرة ومش هتعرف دخلت إزاي الكورة إتعلبكت كدا ولقيناها في الشبكة المهم أبو بكر باري إتصاب وطلع ونزل الحارس البديل بتاعه كان إسمه ستيفان لوبوي…
والواد شكله مش أفريقي خالص.. لما بحثت لقيته مولود في المانيا.. فالولد الحارس البديل جه فيه 3 أجوال.. وفازت مصر 4-1.. والواد لما الماتش خلص قعد قعدة اللي وأكل علقة موت وقعد يشرب (زي الصورة)..
المهم مصر فضلت 3 مرات متروحش أمم افريقيا أصلا فكوت ديفوار خدت البطولة سنة 2015 فروحنا 2017 وهما عملوا بطولة زي الزفت إتعادلوا ماتشين وخسروا ماتش فروحوا بدري المهم في 2021 جينا قصاد بعض
وهما قالوا الحمد لله الحضري إعتزل وهما فريق قوي جدآ.. وتقريبا الحضري هو اللي كان عامل اللعنة.. لأن لعنة إصابة الحراس إنتقلت لينا.. فإتصاب الشناوي في المباراة.. وطلع ونزل أبو جبل.
أبو جبل قدم ماتش عمره ومصر تكسب بركلات الجزاء.. بص يعني بإختصار.. من سنة 2006.. أول ما كوت ديفوار تعرف إنها هتقابل مصر.. بيروح رئيس البعثة يحجز تذاكر طيران ويرجعوا على بلدهم..
إحنا أه خليناهم صعدوا كأس العالم 2006.. وجبنالهم نقطة من قلب الكاميرون .. بس من ساعتها وإحنا بنطفحهم الدردي في كل مرة بنقابلهم..
كوت ديفوار ولعنة الفراعنة ويقولك مفيش لعنة فراعنة.. طيب إسالوا كوت ديفوار كدا..
#بهاء_حجازي
