الفيلم الذي مات بطله قبل عرضه حكاية علاء ولي الدين التي لم تكتمل

الفيلم الذي مات بطله قبل عرضه حكاية علاء ولي الدين التي لم تكتمل

علاء ولي الدين الله يرحمه، لما مات يوم العيد.. مكانش خلص تصوير فيلمه “عربي تعريفة” الفيلم اللي كان علاء معول عليه كتير انه يرجعه تاني لتصدر الإيرادات بعد فشل فيلمه “ابن عز” وقتها…

بعد ما خلص العزاء، واللي راح راح، بقى فيه كلام ان المنتج متضرر من الفيلم، خصوصا إن فريق الفيلم سافر البرازيل وصور هناك، وأي سفر يعني تكلفة مضاعفة.. شوف فريق الفيلم كام واحد، وإقامة وتصريحات سفر وإنتقالات وإيجار لوكيشنات كله بالدولار… وطبعا الفيلم مخلصش أصلا علشان يتعرض ويسدد اللي عليه..

محمود سعد، والرواية على لسانه، بيقول إنه سمعه ان المنتج متضايق وبيقول علاء خسرني، وقال نصا: “وصلتنا بعض الأقاويل عن أن المنتج بيتكلم إنه تعرض لخسارة كبيرة بموت علاء

خاصة أنه أنفق مبلغ كبير في السفر إلى البرازيل، وكان إنتهي من تصوير تلت الفيلم، إقترحت على بعض أصدقائه إننا نعمل برنامج نعوض المنتج بيه عن الفلوس اللي صرفها، وكان قاعد هنيدي والسقا، منى زكي، وناس تانية كتير، ويتم عرضه في الأربعين بتاع علاء

ومحدش مننا يتقاضى أجر نظير ظهوره، والربح يروح كامل للمنتج، المنتج لما عرف كان فرحان جدًا، وقولتله محدش يقول على علاء كلمة وحشة ولا يقول إنه خسر بسببه، وظهر معايا في البرنامج ناس كتير جدًا أحمد السقا ومحمد هنيدي ويسرا وكريم عبدالعزيز ومني زكي وحنان ترك

وقدرنا نصور البرنامج وعملنا 15 حلقة خلال يومين أجرنا فيهم أستديو في الهرم فضلت قاعد وهما بيجوا يصوروا ويمشوا”، انا شفت البرنامج دا كنت في خامسة إبتدائي تقريبا.. بس مش قادر أفتكر إسمه.. ولا ليه وجود على النت.. فلو حد فاكره يفكرني بالإسم..

المهم يعني، إحنا صورنا تلت الفيلم مثلا.. هنعمل ايه.. قفلوا المشاهد اللي إتصورت في البرازيل وعملوا منها كليب، كان علاء مغنيه والمفروض هيبقى في أحداث الفيلم، إسمه إستعراض الجنة، كان كلمات محمد ناصر، المذيع في قناة مكلمين دلوقتي، والحان هشام نزيه، وإخراج عمرو عرفة اللي كان بيخرج تاني عمل ليه بعد فيلم أفريكانو.

فيلم عربي تعريفة، بيحكي عن عربي اللي بيشتغل مدير للتعريفة الجمركية بالإسكندرية في المينا (ومن هنا جه إسم تعريفة)، ومهمته تقدير البضائع ووضع الجمارك المستحقة عليها ويتعرض لمكيدة ما تجعله يتورط في عملية نصب تمتد الى البرازيل..

لما الفيلم راح لعمرو عرفة كان إسمه “فتح عينيك”، ومعرضوش على علاء ولي الدين، لأن علاء كان بيصور فيلم إسمه “كارت إرهاب”، والفيلم بعد ما علاء صور فيه شوية وقف وعطل، وحصل خناقات وخلافات وسابه خالص

الفيلم دا اللي بعد كدا بقى إسمه ميدو مشاكل، وعمله حلمي اللي كان عامل دور بسيط في الفيلم بس بعد إنسحاب علاء أسندوا ليه البطولة..

لكن بعد وفاة علاء بقى السؤال هنعمل إيه في اللي إتصور، وحصل كذا إقتراح يعني، أولهم إننا هنصور الفيلم من الأول تاني بهاني رمزي، ونهديه لروح علاء ولي الدين، وهاني وافق فعلا، بس الموضوع مكملش، وبعدين إقترحوا ان علاء يموت فعلا في أحداث الفيلم

ويجي أحمد رزق يعمل دور اخوه اللي بيظهر بعد وفاة عربي علشان يحل مشكلة البطل، ووافق رزق فعلا، وإتعملت التعديلات، بس وقتها إتحجبت حنان ترك بطلة الفيلم، والموضوع منفعش برضه..

علشان كل اللي تبقى من الفيلم، هو ربع ساعة، موجودين على اليوتيوب.. وبعد سنين، مؤلف القصة حازم الحديدي أعاد تقديمها في شكل مسلسل إسمه حكاية فتاة الليل، من بطولة ليلى علوي.. طبعا مع تغييرات علشان القصة تناسب المسلسل ويبقا الفيلم الذي مات بطله

#بهاء_حجازي