كيروش في 2021 حينما تحول المدرب إلى بلطجي في خدمة المنتخب
كارلوس كيروش كان راجل صايع… صايع بكل ما تعنيه الكلمة من معنى.. مدرب مقطع البطاقة يعني… في بطولة 2021… هو عمل كام كارت كدا ميطلعوش غير من معلم…
إحنا بدأنا البطولة بأداء ولا أزفت قدام نيجيريا وخسرنا 1-0… والأداء فعلا كان يقرف.. راح طالع بتصريح جاب شلل لنص الشعب المصري.. وضحك كل القارة.. قالك سأذهب لنهائي البطولة.. أتمنى ان التقي نيجيريا في النهائي… ورغم إنه تصريح مضحك… بس هو فعلا راح النهائي ونيجيريا هي اللي خرجت…
في مباراة الكاميرون… طلع صامويل إيتو.. قال ان المباراة حرب.. وإننا لازم نفوز بيحمس لاعيبته وهو في نفس الوقت كان رئيس الإتحاد الكاميروني… البلد المضيف للبطولة… فقالهم سيبهولي.. راح المؤتمر الصحفي راح قاله يا سيد إيتو.. الحرب الحقيقية إنك تمنع الناس من الموت.. بيدسه يعني لأن في جماهير ماتت بسبب التدافع…
وقالهم بصوا هيحكم المباراة بكاري جاساما.. سيبهولي.. لو كان هيطرد حد المباراة دي أنا عايزه يطردنا أنا.. وقال محدش من اللاعيبة يتكلم معاه غير صلاح.. بإعتبار إن صلاح نجم عالمي ولو حصل حاجة هتبقى الفضيحة عالمية…
كيروش في 2021 أول ما بدأ المباراة.. وبكاري جاساما لسه أصلا مرتكبش خطأ .. راح كارلوس كيروش نايمله في الأرض.. وقعد ع ركبته.. ورفع إيده للسما… وقاله إشهد يا رب على الظلم اللي إحنا فيه.. بكاري جاساما اتبهت.. راح طارده.. هو باللقطة دي خرج جاساما من الماتش أصلا.. جاساما مش هيطرد المدرب وبعدين يطرد لاعب.. علشان يعني اي حد هيقول ان جاساما متظبط… ومشيت المباراة وكسبنا..
صحيح مظبطتش في النهائي وخسرنا البطولة بركلات الترجيح.. ودي أكتر بطولة كان نفسي نكسبها لأن فيها مشوار مارثوني بشكل.. إحنا لعبنا كل المباريات الاقصائية بوقت إضافي.. تخيل تلاعب في الأدوار الاقصائية كوت ديفوار والمغرب والكاميرون والسنغال… وكلهم تلعبهم 120 دقيقة.. يعني لاعب ماتش كامل زيادة عن السنغال قبل ما تلاعبهم…
اضف كمان إن السنغال كان جاي بيتمختر الناخية التانية، يعني كسب الرأس الأخضر، غينيا الإستوائية، بوركينا فاسو..
#بهاء_حجازي
