الشتاء مش عدوك.. الشتاء فرصتك.
د. نورهان معتمد
في كل مرة يدخل فيها الشتاء، تتكرر نفس المخاوف: الجوع بيزيد، الحركة بتقل، والوزن غالبًا بيعلى. ورغم إن الجسم في البرد بيستهلك سعرات أعلى للحفاظ على حرارته، إلا أن أغلب الناس بيخرجوا من الشتاء بزيادة وزن. السبب إننا ببساطة مش بنستغل مزايا الموسم ده بالشكل الصحيح.
أول نقطة توضح إن الجسم في الشتاء بيحرق أكتر طبيعيًا بنسبة قد تصل 15%، وده لأن الحرارة المنخفضة بتجبره يشتغل أكتر. لكن الميزة دي بتروح لما نقلل الحركة ونلجأ للأكلات الثقيلة والمشروبات الساخنة السكرية.
عشان نستفيد من الحرق الأعلى، كل المطلوب إضافة نشاط بسيط: مشي يومي، طلوع سلالم، أو تمرين خفيف في البيت. حتى 10 دقايق بتفرق لما الجو نفسه بيساعد في زيادة الحرق.
ثاني نقطة هي الشعور المتزايد بالجوع، اللي مش دائمًا بيكون جوع حقيقي. أغلبه مرتبط بالرغبة في الدفء، وبانخفاض شرب المياه، وكمان بتأثير نقص الشمس على هرمونات المزاج.
عشان كده من المهم اختيار أكلات دافئة ومُشبِعة بدون سعرات عالية: شوربة عدس أو خضار، بطاطا مشوية، شوفان بالقرفة، مع مصادر بروتين سهلة الهضم وخضار مطبوخ. دي أكلات تمنح دفء وطاقة بدون ما تسبب زيادة وزن.
ثالثًا، المية جزء مهم في الحفاظ على الوزن في الشتاء. قلة العطش بتخلي كتير يشربوا نصف احتياجهم فقط، وده يسبب جوع وهمي وبطء في الهضم والحرق. شرب ٨ أكواب يوميًا ضروري، حتى لو على شكل مياه دافئة، أعشاب بدون سكر، أو مياه بنكهات طبيعية بسيطة.
رابعًا، تركيز الأكل في الشتاء لازم يكون على تقوية المناعة. الفواكه والخضار الملونة زي البرتقال، اليوسفي، السبانخ، البروكلي، البنجر والجزر مهمة جدًا لدعم الجسم بمضادات الأكسدة والفيتامينات. كمان الزنجبيل والكركم بيساعدوا في التدفئة وتقليل الالتهاب، والبروتين ضروري لبناء المناعة وتجديد الخلايا.
خامسًا، الجانب النفسي مهم جدًا. تأثير الشتاء على المزاج بيخلي البعض يلجأ للأكل كتعويض، وده ممكن يتفادى بالتعرض للشمس، تنظيم النوم، الرياضة الخفيفة، ومشروبات دافئة بدون سكر.
وفي النهاية، تقديم نظام يومي مناسب للشتاء يساعد في التوازن: فطار مشبع دافئ، غداء خفيف غني بالشوربة والبروتين، سناك بسيط، وعشاء هادئ خفيف.الخلاصة
وفي النهاية، تقديم نظام يومي مناسب للشتاء يساعد في التوازن: فطار مشبع دافئ، غداء خفيف غني بالشوربة والبروتين، سناك بسيط، وعشاء هادئ خفيف.الخلاصة
الشتاء مش موسم زيادة وزن إلا لو إحنا سمحنا له. بإدارة بسيطة- حركة، أكل دافئ صحي، شرب مياه كفاية، ونوم منتظم- ممكن يكون الشتاء أفضل وقت لتقوية المناعة والحفاظ على الوزن أو حتى خسارته.
