ياسمين عبد العزيز تروي تفاصيل مرضها لـ”منى الشاذلى”
استضافت الإعلامية منى الشاذلى الفنانة ياسمين عبد العزيز، التى تظهر للمرة الأولى مع زوجها الفنان أحمد العوضى، اليوم، الأربعاء، فى برنامج “معكم”، على قناة cbc.
وقالت منى الشاذلى فى تقديم الفنانة ياسمين عبد العزيز إن خبر إيداعها العناية المركزة أحدث فيضا من الدعوات من ملايين فى الوطن العربى: “ربنا ينجيكِ يا ياسمين” لأن لها رصيد من المحبة فى قلوب الناس، وتحول الإنترنت إلى دفتر دعاء . ولأول مرة تتكلم ياسمين عبد العزيز عن كواليس فترة مرضها.
واستقبلها جمهور الحلقة بالتصفيق الحار، وقالت فى بداية حديثها: “مكنتش عارفة إن فى يوم هطلع فى برنامج أتكلم فى حاجة زى كدة، كنت داخلة أعمل عملية بسيطة جدا ومش أول مرة أعملها، عملتها 5 مرات، وكنت أعملها وأمشى على طول وأروح شغلى ومحدش يعرف حاجة”.
وأضافت : “كان الدكتور بيقولى إزاى تستحملى الوجع ده إنتى بطلة، وأنا بطبعى مش شكاية، روحت أعمل العملية، قلت للدكتور العملية هتاخد قد إيه، قال ساعتين أو تلاتة، كان معايا أحمد وابنتى وصاحبتى، دخلت عملت العملية وكان فيه عملية أخرى فى نفس الوقت، يعنى فى شهرين عملت 4 عمليات، دكتور التجميل بيجمل بطنى، طلعت من العملية بألم رهيب جدا وبصرخ وأقول أنا بموت”.
وتابعت: “فيه تفاصيل أنا مش فاكراها، من كتر ما كانوا بيدونى مسكنات ومخدر، البعض اعتقد إنى بدلع، بعد كام يوم الدكاترة قالوا لو مدخلتش أعمل عملية بعد ساعة هموت، حدث ثقب فى القولون وتسمم فى الدم، دخلت العمليات وكنت حاسة إنى مش هطلع”.
واستكملت باكية: “وأنا داخلة قلت لأخويا الكبير خلى بالك من ياسمين وسيف أولادى.. كنت حاسة إنى هموت، ولما دخلت كانت حالتى صعبة، طلعونى من العملية على العناية المركزة”.
