بعبع الشتا راح
د. حنان ماجد
مع دخول فصل الشتا والجو البرد، بيكون عندنا خوف من زيادة الوزن اللي بتحصل في الكام شهر بتوع الشتا علشان الأكل الكتير على مدار اليوم، وخصوصًا في السهرة بالليل والشعور بالدفء. إيه يا ترى اللي بيخلي جسمنا يجوع بشكل مش طبيعي أول لما الجو يبرد، يا ترى هل ليه سبب علمي؟. أولًا لما الجسم بيحس بالبرودة وقتها بيدور إزاي يكتسب طاقة عشان يرفع بيها حرارة الجسم، والطاقة دي بتكون على شكل الأكل اللي الجسم بيطالبنا بيه كل مرة، يا ترى إيه الحل؟
إزاي تتخلص من شعورك بالجوع
أولًا: لازم تحاول تدفي جسمك بأي طريقة تانية غير الأكل، زي نلعب رياضة خفيفة أو نتمشى.
ثانيًا: نحاول نوزع وجبات على مدار اليوم وناخد السناك بتاعنا عشان وقت السهرة ميبقاش عايزين ناكل كل حاجة موجودة، ونحاول الأكل يبقى فيه ألياف وبروتين عشان تساعد في الشبع، ونقلل من السكريات والنشويات، ونحاول نستفيد من الخضروات والفاكهة في موسم الشتا عشان فيها فوايد كتير وفيتامينات مهمة للجسم؛ زي البطاطس والبطاطا وقرع العسل، وممكن نعمل منها حلويات.
ثالثًا: نشرب حاجات سخنة «مشروبات شتوية»، زي شاي أو ينسون أو أي أعشاب أخرى هتساعد في التدفئة، وفي نفس الوقت من غير سعرات، وممكن نضيف عليها القرفة والليمون والبرتقال، وممكن كمان تشرب hot chocolate اللي أغلبنا بيحبه في الشتا، ونشربه بطريقة صحية باستخدام المعلقتين السكر اللي مسموح بيهم خلال اليوم، أو بسكر دايت، وقتها مش هتحس بالذنب.
هنتكلم عن أهم الأكلات الصحية اللي تدينا إحساس بالشبع والدفء، وفي نفس الوقت هتساعدنا نلتزم بالدايت وتكون مفيدة للجسم وتقوي المناعة من أمراض الشتا.
مفيش حد مش بيحب يشرب شوربة، خصوصًا في فصل الشتا عشان بتساعد في الدفء، بس أهم حاجة تكون بطريقة صحية من غير دسم عشان زيادة الوزن، ممكن نستخدم فيها زيت زيتون وخضروات مع المرقة، وممكن نضيف فيها بروتين زي الفراخ عشان تساعد في الشبع أكتر وتمنح الجسم عناصر غدائية كاملة، وممكن كمان شوربة العدس اللي مشهورة في فصل الشتا وغنية بالبروتين.
نيجي نتكلم بقى عن البليلة اللي ناس كلها بتحبها في فصل الشتا، هي مصدر من مصادر النشويات المعقدة، واللي بتساعد في شبع مع اللبن وسكر دايت، وممكن نضيف عليها كمان قرفة هتبقى وجبة حلوة أوي في الفطار أو العشا، وتساعد في الشبع.
أما الشوفان بقى فمعروف إنه من أكتر الوجبات اللي بتشبع عشان الألياف اللي موجودة فيه وحلوة في الشتا لو سخنة مع لبن وعسل وفاكهة زي الموز.
البطاطا المشوية من أحلى الحاجات اللي ممكن ناخدها سناك في نص اليوم، لأنها نشويات معقدة وفيها معادن وفيتامينات كتير مع رشة قرفة بس، أو مع معلقة عسل.
نيجي بقى للمكسرات، ناس كلها بتحبها صغير وكبير، وهي مصدر للدهون الصحية اللي جسمنا بيحتاجها وبتساعد في تحسين المزاج كمان وزيادة المناعة وسناك هايل أوي، أو ممكن كبشة منها في سهرة بليل.
الشوكولاتة بتحسن المزاج وتنفع سناك مع كوب قهوة، وليها استخدامات كتير، زي ممكن نشربها مع لبن «كاكو ساخن»، وممكن كمان موز مع مكعبين دارك شيكولاتة هتبقى سناك حلو.
نيجي بقى لأهم حاجة، وهي الخضار والفاكهة:
الرمان يعني فصل الشتا، فيه مضادات أكسدة وألياف، أما بقى الكاكا فغنية بفيتامين سي والألياف.
البرتقال واليوسفي والليمون، يعني فصل الشتا، لأنها بتساعد في زيادة المناعة وغنية بفيتامين سي وبتساعد في تقليل البرد في الشتا.
البروكلي مهم عشان تقوية المناعة وغني بفيتامين سي والألياف وبيدي إحساس بالشبع.
القرنبيط والباذنجان وغيرها من الخضروات الشتوية في فرن، وسلطة مع كل وجبة وسناك.
ممكن نعمل أحلى الأكلات بطريقة صحية في الفرن، مفيش أحلى من الأكل الشرقي المصري وطواجن في الشتا بدون دهون مع أي بروتين هناكل وننبسط. في نفس الوقت ممكن تاكل وتشرب وتنبسط وتخس في نفس الوقت، بس الفكرة كلها في الطريقة.
