أنا أم قوية بس مش مفترية
أعمل إيه لو أطفالي رافضين الصوم
كتب : سها العسكري
مع شهر رمضان الكريم بتواجه الأم مشكلة محيرة ومربكة عند تشجيع أطفالها وتدريبهم على الصيام.
فتدريب الطفل على الصيام من الصِغر هو شيء مهم جداً، بيتعود الطفل من خلاله الصبر وتحمّل المسؤولية لحد ما يكبر، ويبقى شاب، لأن الصوم بيمنع عن الشباب ويحميهم من عواقب الشهوات اللي حرمها الله عز وجل.
ولأن رمضان له فرحة خاصة في قلوب الأطفال والكبار، عشان كده لازم الأم تحاول تحبب الصوم في نفس أطفالها من غير ما تحسسهم بضغط عليهم بأي شكل من الأشكال.
عزيزتي الأم، حاولي تراعي أثناء تدريب أطفالك على الصيام، إن في فروق فرديه، وخصائص عمرية، وظروف صحية لكل طفل، كمان البيئة وطبيعة الحركة اليومية لكل طفل من العوامل اللي ليها دور في مدى قدرة الطفل على الصيام. ومننساش إن الشريعة الإسلامية بطبيعتها سمحة، ومبنية على التيسيير، وإن الدين الإسلامي دين رحمة يدعو إلى حب الطاعات.
وعشان نسهل عليكي عزيزتي الأم هذه المهمة، بنقدم لك بعض الحلول اللي بتساعدك تشجعي أطفالك على الصيام:
١- علمي طفلك الصيام تدريجياً، يعني ممكن يبدأ بصوم ساعتين أو أربعة بس في اليوم الأول مع زيادة عدد الساعات في الأيام التالية.
٢- لو فعلاً طفلك التزم بعدد ساعات الصيام، حاولي ساعتها تمدحيه قدام الأسرة، بالطريقة دي هترفعي من معنوياته وتشجعيه على متابعة الصيام.
٣- لو كان عندك أكتر من طفل، اخلقي جو منافسة بينهم كأنهم بيلعبوا، لكن تجنبي تأنيب الطفل اللي مش هيقدر يكمل صيامه للآخر.
٤- اتكلمي مع أطفالك عن فوائد الصيام، وإنه ركن من أركان الإسلام الخمسة وإنه سبب لدخولهم الجنة، وإنه فرض عليهم عشان يحسوا بجوع الفقراء.
٥- كافئي طفلك في حالة لو كمل صيام اليوم للآخر في رمضان، بس من غير مبالغة في نوع المكافأة، عشان ميبقاش الصيام عنده مرتبط دايماً بالمكافآت، لكنه بيأديه عشان يكسب رضا ربنا عليه.
٦- حاولي تشغلي طفلك خلال فترة الصوم ببعض الأعمال، زي كده تلاوة القرآن أو حتى إنه يتابع أفلام الكرتون، عشان ميبقاش تركيزه كله على عطش الصيام.
٧- لو شعر طفلك بإعياء زي صداع أو دوخة، متخليهوش يكمل صيامه عشان مايكرهش عبادة الصوم، وتأثر نفسياً عليه.
٨- ممكن كمان تخليه يعزم صحابه على الفطار كنوع من أنواع التشجيع.
وفي الختام عزيزتي الأم، حاولي مايبقاش تركيزك كله مع أطفالك خلال شهر رمضان على الصوم بس، اهتمي كمان بالدور التربوي للشهر الفضيل، زي المقاصد الصحيه والاقتصادية والاجتماعية للصوم. وربط الطفل بالمسجد والأعمال التطوعيه لغرز القيم الجميله عند طفلك بشهر رمضان الكريم.
